Sálmarnir kap. 61

1 Til songmeistaran. Við streingjaleiki. Eftir Dávid.

2 Gud, hoyr róp mítt, lurta eftir bøn míni!

3 Frá enda jarðarinnar rópi eg til Tín, meðan hjarta mítt ørmaktast. – Leið meg til klettin, sum er hægri enn eg!

4 Tí Tú ert skjól mítt, sterkt torn móti fíggindanum.

5 Lat meg í allar ævir búgva í tjaldi Tínum, lat meg finna lívd í veingjaskugga Tínum! – Sela.

6 Ja, Tú, Gud, hevur hoyrt lyfti míni, Tú hevur uppfylt ynski teirra, ið óttast navn Títt!

7 Tú skalt leggja dagar aftrat døgum kongsins, ár Hansara skulu vara mann eftir mann.

8 Hann skal sita í hásæti allar ævir fyri ásjón Guds; set náði og sannleika at varðveita Hann!

9 So skal eg til ævigar tíðir lova navni Tínum og soleiðis dag eftir dag halda lyfti míni.

Sálmarnir kap. 61 Uppsetan