Ezekiel kap. 36
Uppsetan
Bíbliu útgáva
Tema
iii.
A Prophecy to the Mountains of Israel
36:1-15:1
1
Men tú, menniskjasonur! Profetera um Ísraelsfjøll og sig: Hoyrið orð HARRANS, Ísraelsfjøll!
2
So sigur Harrin HARRIN: Við tað at fíggindin segði um tykkum: „Tað var rætt! Hinar ævigu hæddir eru vorðnar ogn okkara!“
3
– so skalt tú profetera og siga: So sigur Harrin HARRIN: Við tað at – ja, við tað at teir oyða tykkum og liggja eftir at gloypa tykkum úr øllum ættum, so hinar tjóðirnar kunnu fáa tykkum at eiga, og við tað at tit eru komin á tungur og varrar og í ringt orð millum fólk,
4
hoyrið tí orð Harrans HARRANS, Ísraelsfjøll! So sigur Harrin HARRIN við fjøllini, hæddirnar, gilini og dalarnar, við oyðitoftirnar og býirnar, sum fólkið er rýmt úr, sum eru vorðin hinum tjóðunum – sum rundan um tykkum búgva – til rán og til spott
5
– ja, tí sigur Harrin HARRIN so: Sanniliga, í brennandi vreiði Míni havi Eg talað móti hinum tjóðunum og móti øllum Edom, sum hava ætlað sær land Mítt til ogn við gleði hjartans og við vanvirðing innast úr sálini, fyri at reka út tey, ið har búgva, og gera tað til rán.
6
Tí skalt tú profetera um Ísraelsland og siga við fjøllini, hæddirnar, gilini og dalarnar: So sigur Harrin HARRIN: Ja, Eg havi talað í vreiði og bræði Míni: Aftur fyri at tit eru so háðað av tjóðunum,
7
tí sigur Harrin HARRIN so: Eg havi lyft hondini og svorið: Sanniliga, tjóðirnar, ið rundan um tykkum búgva, skulu sjálvar koma at tola háð!
8
Men tit, Ísraelsfjøll, á tykkum skulu greinarnar vaksa aftur, og tit skulu bera Ísrael, fólki Mínum, ávøkst; tí tey skulu skjótt koma aftur.
9
Tí Eg komi til tykkara, Eg skal venda Mær til tykkara, og tit skulu verða dýrkað og sáað.
10
Eg skal lata menniskju koma niðan á tykkum – alt hús Ísraels – í býunum skal aftur búgva fólk, og toftirnar skulu verða upp aftur bygdar.
11
Ja, Eg skal lata nøgd av menniskjum og fæi koma niðan á tykkum, og tey skulu nørast og vera fruktbør; Eg skal lata fólk búgva á tykkum sum í fornum tíðum og gera tykkum enn meiri gott enn í hini fyrru tíð tykkara – og tit skulu sanna, at Eg eri HARRIN.
12
Eg skal lata menniskju – Ísrael, fólk Mítt – ganga á tykkum, og tey skulu taka teg* í ogn; tú skalt vera arvalutur teirra, og tú skalt ikki longur gera tey barnleys.
13
So sigur Harrin HARRIN: Við tað at sagt verður við teg: „Tú ert menniskjaátari, tú hevur gjørt tjóðir tínar barnleysar!“
14
– so skalt tú ikki eta menniskju longur og ikki leiða tjóðir tínar í fall longur – sigur Harrin HARRIN.
15
Og Eg skal ikki longur lata teg hoyra háð heidninganna; spott tjóðanna skalt tú ikki bera longur, og tínar egnu tjóðir skalt tú ikki longur leiða í fall – sigur Harrin HARRIN.
iv.
A New Heart and a New Spirit
36:16-38:1
16
Orð HARRANS kom til mín; Hann segði:
17
Menniskjasonur! Hús Ísraels búði í landi sínum, og tey gjørdu tað óreint við atburði sínum og verkum sínum; sum óreinska kvinnu, ið hevur mánasjúku, var atburður teirra fyri ásjón Míni.
18
Tá úthelti Eg yvir tey vreiði Mína, fyri blóðið, sum tey høvdu úthelt í landinum, og tí tey høvdu gjørt tað óreint við avgudum sínum.
19
Eg spjaddi tey millum tjóðirnar, og tey vórðu stroydd út um londini; eftir atburði teirra og verkum teirra dømdi Eg tey.
20
Men táið tey komu til tjóðirnar, ið tey komu til, vanhalgaðu tey heilaga navn Mítt, við tað at sagt varð um tey: „Hetta er fólk HARRANS, og tey noyddust kortini at fara úr landi Hansara!“
21
Tá tók tað Mær sárt, at hús Ísraels skuldi so vanhalga heilaga navn Mítt millum tjóðirnar, ið tey vóru komin til.
22
Tí skalt tú siga við hús Ísraels: So sigur Harrin HARRIN: Ikki fyri tykkara skuld, hús Ísraels, geri Eg hetta, men fyri heilaga navns Míns skuld, sum tit hava vanhalgað millum tjóðirnar, ið tit eru komin til.
23
Eg skal halga stóra navn Mítt, sum er vanhalgað millum tjóðirnar – sum tit hava vanhalgað millum teirra – og tjóðirnar skulu sanna, at Eg eri HARRIN – sigur Harrin HARRIN – táið Eg fyri eygum teirra opinberi heilagleika Mín á tykkum.
24
Eg skal fáa tykkum heimaftur frá tjóðunum og savna tykkum saman úr øllum londunum, og Eg skal lata tykkum koma til tykkara egna land.
25
Og Eg skal sletta reint vatn á tykkum, so tit verða rein; frá allari óreinsku tykkara og frá øllum avgudum tykkara skal Eg reinsa tykkum.
26
Eg skal geva tykkum nýtt hjarta, og nýggjan Anda skal Eg geva tykkum í bróstið; Eg skal taka burt steinhjartað úr likami tykkara og geva tykkum kjøthjarta.
27
Anda Mín skal Eg geva tykkum í bróstið, og Eg skal gera, at tit ganga eftir boðum Mínum og halda lógir Mínar og gera eftir teimum.
28
Tit skulu búgva í landinum, sum Eg gav fedrum tykkara, og tit skulu vera fólk Mítt, og Eg skal vera Gud tykkara.
29
Eg skal frelsa tykkum frá allari óreinsku tykkara, og Eg skal kalla á kornið og margfalda tað og ikki lata hungursneyð koma á tykkum.
30
Eg skal margfalda ávøkst træanna og grøði jarðarinnar, so hungur skal ikki longur volda, at tit verða háðað av tjóðunum.
31
Tá skulu tit minnast ónda atburð tykkara og verk tykkara, sum ikki vóru góð, og tit skulu vamlast við tykkum sjálv fyri misgerðir og viðurstygdir tykkara.
32
Ikki fyri tykkara skuld geri Eg hetta – sigur Harrin HARRIN – tað skulu tit vita! Blúgvist og skammist um atburð tykkara, hús Ísraels!
33
So sigur Harrin HARRIN: Tann dag Eg reinsi tykkum frá øllum misgerðum tykkara, skal Eg aftur lata fólk búgva í býunum, og toftirnar skulu verða upp aftur bygdar;
34
landið, sum lagt var í oyði, skal verða dýrkað, í staðin fyri at tað var oyðimørk fyri eygum hvørs mans, ið framvið gekk.
35
Tá skal verða sagt: „Hetta land, sum lagt var í oyði, er vorðið sum urtagarður Edens; og býirnir, sum herjaðir vóru, lagdir í oyði og niðurrivnir, eru reistir aftur og hava fingið múrar.“
36
Og tjóðirnar, ið eftir verða rundan um tykkum, skulu sanna, at Eg, HARRIN, havi bygt upp aftur tað, ið niður var rivið, og av nýggjum plantað hitt oydda land. – Eg, HARRIN, havi sagt tað, og Eg skal gera tað.
37
So sigur Harrin HARRIN: Eisini í hesum skal Eg bønhoyra hús Ísraels, so Eg geri tað fyri tey: Eg skal gera tað so fólkaríkt sum seyðafylgi;
38
sum heilagt fylgi, sum seyðafylgi Jerusalems høgtíðirnar har, so skulu hinir oyddu býir verða fullir av menniskjafylgjum – og tey skulu sanna, at Eg eri HARRIN.