Ezekiel kap. 18
Uppsetan
Bíbliu útgáva
Tema
viii.
The Soul Who Sins Will Die
18:1-32:1
1
Orð HARRANS kom til mín; Hann segði:
2
Hvussu tora tit at nýta hetta orðtak í Ísraelslandi: „Fedrarnir eta súr vínber, og børnini fáa sárar tenn“?
3
So satt sum Eg livi – sigur Harrin HARRIN – skulu tit ikki longur nýta hetta orðtak í Ísrael.
4
Allar sálirnar hoyra jú Mær til; bæði sál faðirsins og sál sonarins – Mær hoyra tær til; tann, ið syndar, skal doyggja.
5
Táið maður er rættvísur og ger rætt og rættvísi,
6
etur ikki* á fjøllunum, kastar ikki eyguni á hinar andstyggiligu avgudar Ísraelsmanna, ger ikki konu næsta síns óreina, kemur ikki kvinnu nær, meðan hon er órein,
7
kúgar ongan, men letur skuldaran fáa pant hansara aftur, rænir ikki frá øðrum, men gevur hinum svanga breyð sítt og klæðir hin nakna,
8
lænir ikki fyri rentu og tekur ikki yvirmál, heldur hond síni frá órætti, dømir rættan dóm millum mann og mann,
9
gongur eftir boðum Mínum og heldur lógir Mínar, so hann ger tað, ið rætt og gott er – hann er rættvísur, hann skal vissuliga liva, sigur Harrin HARRIN.
10
Men fær hann nú son, ið verður yvirgangskroppur, sum úthellir blóð og ger okkurt av øllum hesum
11
– ið hann sjálvur* ikki gjørdi – ein, ið etur á fjøllunum, ger konu næsta síns óreina,
12
kúgar hin arma og fátæka, rænir frá øðrum, letur ikki pantin aftur, kastar eyguni á hinar andstyggiligu avgudar, ger tað, ið viðurstyggiligt er,
13
lænir fyri rentu og tekur yvirmál – skuldi hann tá sloppið at livað! Nei, hann skal ikki sleppa at liva! Alt hetta viðurstyggiliga hevur hann gjørt, hann skal vissuliga bøta við lívinum, blóð hansara skal koma yvir hann.
14
Men fær so uppaftur hann son, sum sær allar syndirnar, ið faðir hansara ger – sær tær og ger ikki eftir teimum –
15
ein, ið ikki etur á fjøllunum, ikki kastar eyguni á avgudar Ísraelsmanna, ikki ger konu næsta síns óreina,
16
ongan kúgar, ikki tekur pant, ikki rænir frá øðrum, men gevur hinum svanga breyð sítt og klæðir hin nakna,
17
heldur hond síni frá hinum arma, ikki tekur rentu og yvirmál, men ger eftir lógum Mínum og gongur eftir boðum Mínum, so skal hann ikki doyggja fyri misgerð faðirs síns – nei, vissuliga skal hann sleppa at liva.
18
Men faðir hansara, sum gjørdi yvirgangsverk, rændi frá bróður sínum og gjørdi millum fólk sítt tað, ið ikki er gott – ja, hann skal doyggja fyri misgerð sína.
19
Og so siga tit: „Hví skal ikki sonurin bera misgerð faðirs síns?“ – Sonurin hevur jú gjørt rætt og rættvísi; øll boð Míni hevur hann hildið og gjørt eftir teimum; hann skal vissuliga liva.
20
Tann, ið syndar, skal doyggja; sonurin skal ikki bera misgerð faðirs síns, og faðirin skal ikki bera misgerð sonar síns; rættvísi hins rættvísa skal hvíla yvir honum, og gudloysi hins gudleysa skal hvíla yvir honum.
21
Men táið hin gudleysi vendir við frá øllum syndunum, ið hann hevur gjørt, heldur øll boð Míni og ger rætt og rættvísi, so skal hann vissuliga liva, hann skal ikki doyggja.
22
Einki av misbrotunum, ið hann hevur gjørt, skal verða honum tilroknað; aftur fyri rættvísina, ið hann hevur gjørt, skal hann liva.
23
Skuldi Eg havt gleði av, at hin gudleysi doyr! – sigur Harrin HARRIN; man Eg ikki heldur hava gleði av, at hann vendir frá leið síni – og livir!
24
Men táið hin rættvísi vendir frá rættvísi síni og ger órætt, ger eftir øllum viðurstygdunum, ið hin gudleysi ger – skuldi hann tá sloppið at livað! – Eingin av rættvísigerðunum, ið hann hevur gjørt, skal verða honum tilroknað; fyri trúloysið, ið hann hevur víst, og fyri syndina, ið hann hevur gjørt, skal hann doyggja.
25
Og so siga tit: „Atburður HARRANS er ikki rættur!“ – Hoyr nú, hús Ísraels! Er tað atburður Mín, ið ikki er rættur! Er tað ikki atburður tykkara, ið ikki er rættur!
26
Táið hin rættvísi vendir frá rættvísi síni og ger órætt, skal hann doyggja til straff fyri tað; fyri órættin, ið hann ger, skal hann doyggja.
27
Og táið hin gudleysi vendir frá gudleysa atburði sínum og ger rætt og rættvísi, skal hann bjarga lívinum.
28
Hann sá – og vendi við frá øllum misbrotunum, ið hann hevði gjørt; hann skal vissuliga liva, hann skal ikki doyggja.
29
Og tó sigur hús Ísraels: „Atburður HARRANS er ikki rættur!“ – Er tað atburður Mín, ið ikki er rættur, hús Ísraels! Er tað ikki atburður tykkara, ið ikki er rættur!
30
Tí skal Eg døma tykkum, hús Ísraels, hvønn eftir atburði hansara – sigur Harrin HARRIN. Vendið við, vendið tykkum burt frá øllum misbrotum tykkara, so ikki onkur misgerð verður tykkum til fall!
31
Kastið frá tykkum øll misbrot tykkara, sum tit hava gjørt móti Mær, og fáið tykkum nýtt hjarta og nýggjan anda! – Hví vilja tit doyggja, hús Ísraels?
32
Tí Eg havi onga gleði av, at nakar doyr – sigur Harrin HARRIN; vendið tí við, so skulu tit liva!