Fyrra Sámuelsbók kap. 13
Uppsetan
Bíbliu útgáva
Tema
c.
Saul Fails as King
13:1-15:35
i.
Saul vs. the Philistines
13:1-14:46
1.
War with the Philistines
13:1-7:1
1
Saul hevði nú verið kongur eitt ár; og táið hann hevði verið kongur yvir Ísrael tvey ár,
2
valdi hann sær 3000 mans av Ísrael; av teimum vóru 2000 hjá Saul í Mikmas og á Betelsfjøllum, og 1000 vóru hjá Jónatan í Gibea í Benjamin; tað, ið eftir var av herfólkinum, læt hann fara, hvønn heim til sín sjálvs.
3
Tá drap Jónatan filistaravaktina í Geba. Hetta fingu Filistarar at frætta; men Saul læt blása í horn um alt landið og segði: „Hebrearar skulu hoyra tað!“
4
Alt Ísrael fekk at hoyra tíðindini um, at Saul hevði dripið filistaravaktina, og at Filistarar fyri hetta høvdu kastað hatur á Ísrael. Og fólkið varð stevnt saman í Gilgal at fylgja eftir Saul.
5
Filistarar savnaðust nú til bardaga móti Ísrael, 3000 vagnar, 6000 hestmenn og fótfólk so nógv í tali sum sandurin á sjóvarstrond; teir hildu avstað og tóku støðu í Mikmas, beint yvir av Bet-Aven.
6
Táið nú menn Ísraels sóu vandan, teir vóru í – tí fólkið var trongt statt – krógvaði fólkið seg í hellum, tornarunnum, gjáum, bergskorum og brunnum.
7
Summir Hebreararnir fóru um Jordan til Gads- og Gileadsland; men Saul var í Gilgal enn, og alt fólkið fylgdi honum hjartkipt eftir.
2.
Saul’s Unlawful Sacrifice
13:8-15:1
8
Hann bíðaði nú sjey dagar, inntil ta tíðina ið Sámuel hevði ásett; men Sámuel kom ikki til Gilgal, og fólkið spjaddist og fór frá honum.
9
Tá segði Saul: „Fáið mær brenniofrið og takkofrini higar!“ So ofraði hann brenniofrið.
10
Men júst sum hann var liðugur at ofra brenniofrið – tá kom Sámuel! Og Saul fór ímóti honum at heilsa honum.
11
Tá segði Sámuel: „Hvat hevur tú gjørt!“ Saul svaraði: „Eg sá, at fólkið spjaddist og fór frá mær; men tú komst ikki ta ásettu tíðina, og Filistarar savnaðust saman við Mikmas;
12
so hugsaði eg: „Nú leggja Filistarar á meg í Gilgal, og eg havi ikki blíðkað HARRAN enn!“ – Tá tók eg mót í meg og ofraði brenniofrið.“
13
Sámuel segði við Saul: „Tú hevur borið teg at sum ein dári! Hevði tú hildið boðið, ið HARRIN Gud tín gav tær, so hevði HARRIN nú grundfest kongadømi títt yvir Ísrael til ævigar tíðir.
14
Men nú skal kongadømi títt ikki verða standandi; HARRIN hevur valt Sær út mann eftir hjarta Sínum, og hann hevur HARRIN kallað til høvdinga yvir fólki Sínum – við tað at tú hevur ikki hildið tað, ið HARRIN beyð tær!“
15
So fór Sámuel avstað og fór úr Gilgal til Gibea í Benjamin. Saul taldi fólkið, ið hann hevði hjá sær, um 600 mans.
3.
Israel without Weapons
13:16-23:1
16
Saul og sonur hansara Jónatan og fólkið, ið teir høvdu hjá sær, hildu seg í Geba í Benjamin, og Filistarar høvdu tikið støðu við Mikmas.
17
Úr Filistaraherinum fór nú ránsmannaskari út í trimum flokkum; ein flokkurin tók leiðina til Ofra í Sualslandi,
18
ein tók leiðina til Bet-Horon, og ein tók leiðina til hæddina, ið hallar niður ímóti Zebo’imsdali – yvir ímóti oyðimørkini.
19
– Eingin jarnsmiður var í øllum Ísraelslandi tá; tí Filistarar hugsaðu sum so: „Hebrearar kundu smíðað sær svørð og spjót!“
20
Tí noyddist alt Ísrael at fara til Filistarar at fáa hvest plógjørn, grev, øksir og píkar –
21
táið eggin var óhvøss á plógjørnum og grevum, ella við kvíslum og øksum – ella fyri at fáa ein pík ísettan.
22
Av hesum kom tað, at tann dagin, ið bardagin stóð við Mikmas, hevði eingin av monnunum, ið við Saul og Jónatan vóru, svørð ella spjót – eingin hevði vápn uttan Saul og sonur hansara Jónatan.
23
Filistarar settu nú oddaflokk í Mikmasskarð.